Национален извештај за Република Северна Македонија
Националниот извештај е подготвен во рамки на Проектот „АРИСЕ: Акција за намалување на нееднаквостите во образованието“(ARISE: Action for Reducing Inequalities in Education) 1,регионален проект што се спроведува во Албанија, Босна и Херцеговина, Косово, Северна Македонија, Србија и Турција, а е финансиран од Европската комисија. Целта на проектот е да ја поддржи инклузијата на учениците со низок социоекономски статус (СЕС), и тоа преку градење национални и регионални партнерства на граѓанските организации од шесте земји кориснички заради нивно вклучување во застапување и конструктивен дијалог со властите за соодветните политики, во подигање на свеста кај засегнатите страни во образованието и во пилот-интервенции насочени кон учениците со низок СЕС на училишно ниво.
Податоците и информациите претставени во овој Национален извештај се собрани преку прашалник за политиките пополнет по анализата на документите за политиките кои се однесуваат на рамноправноста и по консултации со релевантни установи и експерти, како и фокус-групи и интервјуа со носители на политиките, училишни директори, наставници и стручни служби, ученици, родители, граѓански организации и експерти од областа на образованието. Фокус-групите и интервјуата се спроведени за да се осознае перспективата на засегнатите страни за прашања поврзани со рамноправноста генерално и во однос на образовниот контекст во земјата.